Paghulip sa CCPO chief gipaabot sa Ombuds

CEBU, Philippines - Gipaabot ni acting Cebu City Mayor Edgardo Labella sa Ombudsman ang iya’ng pagkwestiyon sa paghulip sa pangulo sa Cebu City Police Office.

Iya’ng suwat gipadangat kang Deputy Ombudsman for the Military and Other Enforcement Office, Cyril Ramos, kinsa iya’ng gipahibalo sa iya’ng kasagmuyo sa pagtudlo ni Police Senior Supt. Benjamin Santos hulip kang Senior Supt. Mariano Batiancela.

Gitumbok ni Labella ang Republic Act 6972 kung ang “Act Establishing Philippine National Police Under Reorganized Department of Interior and Local Government and other Purposes” diin nagmando nga ang mayor ang mopili sa mga irekomendar nga mahimo’ng hepe sa kapolisan.

Gipasabot ni Labella nga wala niya gikwestiyon ang kredibilidad ni Santos apan buot lang niya nga matubag ang kalit nga paghulip kang Batiancela.

Apil nga gipadalhan og suwat ni Labella ang Philippine National Police Camp Crame ug National Police Commission.

Samtang nangayo og despensa sa mga sakop sa media si Santos sa wala niya pagpakita sa media tulo ka adlaw human sa iya’ng pagkatudlo sa pwesto.

Matud ni Santos nga daghan siya og giatiman ilabi na sa mga programa nga iya’ng gihan-ay alang sa umaabot nga dagku’ng kalihukan sa siyudad sama sa Sinulog.

Gipasabot ni Santos nga wala usab siya nasayud ngano’ng gitudlo siya isip hepe sa CCPO bisan wala siya naapil sa lima ka pangalan nga gipapilian kang Labella.

Matud ni Santos nga ang naghikay sa iya’ng paglingkod sa CCPO mao ang Senior Officers Placement and Promotions Board sa Camp Crame.

Wala pa sila nagkakita apan gipanghinaut ni Santos nga matagaan siya og higayon ni Labella nga makapakita sa iya’ng abilidad.

Dili na bag-o ni Santos ang Dakbayan sa Sugbo human kini nagsilbi’ng comptroller sa Police Regional Office-7.

Alang ni Santos lisud tuohan nga gumikan sa politika nga  nabutang siya sa CCPO hulip kang Batiancela nga gikataho’ng mao’y gusto ni Labella nga mamahimo’ng permanente’ng pangulo sa kapolisan sa dakbayan.  (BANAT NEWS)