Kapin P1M shabu nasakmit
CEBU, Philippines - Kapin sa usa ka milyon ka pesos nga kantidad sa drugas ang nasakmit ug siyam ka tawo ang nadakpan sa kapulisan sa dakbayan ug probinsya sa Sugbo atol sa managlahing operasyon niadtong nakalabay nga hapon ug kaadlawon.
Sa Dakbayan sa Sugbo, usa ka joint operation ang gilusad sa mga sakop sa Regional Anti-Illegal Drugs Special Operations Task Group-7, City Anti-IIlegal Drugs Special Operations Task Group, Regional Public Safety Battalion7 ug Mambaling Police Station, diha sa Spollarium Street, Sitio Bayotan ug Sitio Panaghiusa, Brgy. Duljo Fatima kagahapon sa kaadlawon.
Bitbit sa kapulisan ang duha ka mga search warrants nga gi-isyu ni RTC Judge Wilfredo Navarro batok nila ni Michael Cuaderno, 35, ug Leonisa Abellar,55.
Sa balay ni Cuaderno nakuha ang daghang pinaketeng shabu nga mokantidad og P650 mil, usa ka M16 Rifle, ug usa ka 38 revolver. Sa balay ni Abellar, 50 ka pakete sa shabu ang nasakmit ug sa kinatibuk-an P700 mil nga kantidad sa shabu ang nasakmit gikan sa mga suspek.
Gawas sa duha laing lima ka mga tawo ang nasikop nga sila si Mark Raymond Tan, Kier Gatila, Joebert Abarquez, Rosendo Abarquez ug Christopher Tandoy nga pulos nakuhaan og drugas. Nasakmit usab sa kapulisan ang 52 ka mga video karera sa maong dapit apan walay bisan usa nga miangkong tag-iya niini.
Samtang sa lungsod Balamban nadakpan si Julie Milan diha sa Brgy. Buanoy ug nakuhaa’g shabu ug armas.
Sa lungsod sa Pinamungajan, kapin P243 mil nga shabu ang nasakmit gikan kang Juanita Papasin
Samtang nadakpan sab sa Dakbayan sa Lapu-Lapu ug Cordova sila si Roweno Aton, 43, ug Ajiejake Rafaela, 31, ug si Rosemarie Cortes, 30, ug Ruben Tero Amorin ,28. (BANAT NEWS)
- Latest
