150 balay naugdaw

CEBU, Philippines - Gibanabanang 150 ka mga panimalay ang gilamoy sa dakong sunog nga miigo sa Sitio San Isidro Labrador ug Sto. Niño diha sa Brgy.Quiot ning Dakbayan sa Sugbo kagabii.

Matud pa nga ang insidente kagabii maoy kinadak-ang sunog nga natala karon dinhi sa Sugbo ning pagsud sa tuig 2016.

Base sa pasiunang gihatag nga impormasyon sa mga opisyales sa barangay, ang mga biktima anha lang una ipahiluna sa mga basketbolan sa Lower Yati, Greenbelt ug Brgy. Quiot Sports Complex.

Ang mga biktima gihatagan na og pasiunang pagkaon sa siyudad kagabii ug dugang mga hinabang pa ang ihatud karong buntag gikan sa Department of Social Welfare and Services sa siyudad.

Sumala pa ni Senior Fire Officer 2 Lowel Opolentisima, ang fire scene investigator sa Bureau of Fire Protection ang sunog nagsugod sa panimalay sa usa ka Valeriana Ogahayon gumikan sa nabiyaan nga giluto.

Matud pa ni Opolentisima gidakop sa kalayo ang trapal sa panimalay ni Ogahayon nga ginama sa light materials ug daling mikatap sa mga silingang kabalayan nga ginama usab sa light materials.

Apan si Opolentisima nagkanayon nga ila usab gitan-aw nga basin kandila nga nabiyaan ang hinungdan niini kay way kuryente sa maong balay.

Naglisod ang kabomberohan tungod sa kahuot sa dalan padung sa sud ug nagdasok ang mga tawo hinungdan nga giisa dayon ngadto sa Task Force Alpha ang alarma tulo ka minutos human nadawat ang alarma alas 6:15 sa kagabii. Ang sunog nakontrolar alas 7:34 apan nagbilin kini og gibanabanang P1 milyon nga danyos.

Matud pa ni Opolentisima, tungod sa kagamay sa dalan, ilang gisumpay-sumpay ang mga fire hoses padung sa fire scene. Si Kagawad Paulina Paras nga nakahinabi sa Banat News mibutyag nga anha lang una ipahiluna ang mga nasunogan sa ilang mga basketball courts sa barangay.

Si Paras nagkanayon nga  hangtud way court order nga magdili sa mga tawo makatukod pagbalik sa ilang mga balay tugotan nila ang mga nasunogan nga makatukod pagbalik niini. Nasayran nga pribadong tawo ang nanag-iya sa maong luna.

Si Konsehal Dave Tumulak kinsa daling niresponde sa dapit mibutyag sa unang pamahayag nga mokabat og 50 ka panimalay ang naugdaw, apan mas daghan diay kini human nasusi sa kabomberohan.

Si Sally Escalito, usa sa mga nasunogan nga nakahinabi sa Banat News nagkanayon nga tapot-lawas lang gyud ang ilang nadala tungod sa kapaspas sa hitabo.

Way natala nga nakalas sa maong insidente gawas lang sa ginagmay nga nangapangos tungod sa pagdinaganay.

Ang kabomberohan padayon pa sa ilang imbestigasyon kabahin sa insidente samtang ang barangay nagsugod na pagpanglista sa mga nasunogan.

Mao kini ang ikaduhang sunog kagahapong adlawa nga nahitabo sa dakbayan diin ang una nahitabo sa Sitio Buli, Inayawan nga diin naugdaw ang panimalay sa usa ka Merlyn Cabuntagon kinsa gikan pa nagsimba pasalamat sa iyang adlaw nga natawhan, nasunog usab ang katupad nilang balay. (BANAT NEWS)