PCAC gusto’ng magpabilin ang CCPO chief

CEBU, Philippines - Gisupak sa Police Coordinating and Advisory Council sa Dakbayan sa Sugbo ang pagrelibo kang Cebu City Police Office Director Marciano Batiancela.

Atol sa tigum sa PCAC, ila giawhag ang kadagkuan sa Philippine National Police, National Police Commission ug Department of Interior and Local Government sa pagpabilin kang Batiancela sa pwesto.

Nangayo usab ang PCAC og katin-awan labot sa basehanan sa pagbalhin-balhin og mga opisyal sa kapolisan ilabi na nga nagsugod na ang election ban niadto’ng Enero 10.

Matud sa pangulo sa PCAC, Engr. Eugene Elizalde, nga ila’ng natuki ang isyu ilabi na nga umaabot ang dagku’ng kalihukan sa dakbayan sama sa Sinulog ug 51st International Eucharistic Congress.

Gipadayag ni Elizalde nga kalit kaayo ang paglahugay sa mga sakop sa kapolisan hinungdan nga nangayo sila og dinalian nga tubag. (BANAT NEWS)