Pag-uli sa P20 mil gihimakak ni Rama
CEBU, Philippines - Gihimakak ni suspended Cebu City Mayor Michael Rama ang pasangil nga giuli niya sa City Treasurer’s Office ang P20 mil nga calamity aid nga iya’ng nadawat niadto’ng 2013.
Buot si Rama nga kini maimbestigar tungod kay nakadawat siya og estorya kabahin sa pasangil ug anaa na usab kini sa mga social media.
Giklaro ni Rama nga wala siya kahibalo ug wala siya’y gisugo aron pagbalik sa kwarta ngadto sa CTO.
Dugang ni Rama nga na-shock na lang siya sa pagkahibalo nga nikatap na sa social media ang pasangil.
Sa Facebook page nga Maghisgot Kita’g Politika gi-post ang resibo nga giingong kamatuoran nga gibalik ni Rama ang P20 mil niadto’ng Enero 8, 2016.
Gisaway sa mga netizens si Rama tungod sa iya’ng pag-ingon sa mga konsehal nga niuli sa tag P20 mil kaniadto nga “too late the hero”.
Ang niuli sa tag P20 mil mao sila si Konsehal Nida Cabrera, Sisinio Andales, Eugenio Gabuya Jr. ug Nestor Archival kinsa mga sakop sa Bando Osmeña Pundok Kauswagan (BOPK). (BANAT NEWS)
- Latest
