Binotelya, de lata di ipabaligya sa agianan
CEBU, Philippines - Gidili sa Cebu City Disaster Risk Reduction and Management Office ang pagpamaligya og mga ilimnon nga sulod sa botelya ug talinis nga gamit sa maagian sa Solemn Foot Procession karong Sabado ug Sinulog Grand Parade karong Domingo.
Matud sa pangulo sa CCDRRMO, Konsehal Dave Tumulak, nga kini aron paglikay sa peligro sa mga manan-away ug sa mokuyog sa prosesyon nga mga deboto.
Idili usab bisan ang mga aluminum nga canned softdrinks.
Giawhag sa CCDRRMO ang paggamit og styrofoam o plastic nga mga baso ug plato.
Samtang gilimitahan usab ngadto sa tag duha ka oras ang pagpalupad og chopper aron paglikay sa disgrasya.
Kinahanglan usab nga adunay pagtugot gikan sa Civil Aviation Authority of the Philippines (CAAP) diin kasamtangang aduna pa la’y upat ka aircrafts ang nahatagan og pagtugot.
Gidili usab ang paglabay sa mga freebies gikan sa aircraft ug sa float atol sa grand parade.
Sugod ugma sugdan na sa Task Force Carousel ang pagpanglibot sa tanang establisemento aron pagseguro nga masunod ang nasabutan ug pagsakmit sa mga gipangdili ug paghawan sa agianan. (BANAT NEWS)
- Latest
