Limpiyo’ng tubig, pagkaon andamon
CEBU, Philippines - Gipaabot ang grabe’ng init atol sa kalihukan sa Sinulog 2016 sama sa Solemn Foot Procession karong Sabado ug Grand Parade karong Domingo.
Kini ang hinungdan nga ang Department of Health ug National Nutrition Council sa Rehiyon-7 nipahimangno sa katawhan nga limpyo’ng tubig ang imnon ug limpyo’ng pagkaon lang gyud ang kaonon.
Sugyot ni NNC-7 Director Parolita Mission nga mas maayo pa nga magbawon og luto gikan sa balay ug magdala og kaugalingong tubig nga butangan og gamay nga asin ug pug-an og lemonsito aron dili dali’ng ma-dehydrate.
Gawas sa pagsuot og mga kalo, shades ug uban pa nga panagang sa init ug uwan, mas maayo nga magsuot og komportable nga sapot.
Ang Metropolitan Cebu Water District ang mopakatap og libre’ng tubig sa rota sa Solemn Foot Procession ug Grand Parade.
Matud sa tigpamaba sa MCWD, Charmaine Rodriguez- Kara, nga karong Sabado ang mga water stations ipahimutang sa dalan Leon Kilat duol sa Gaisano South, N. Bacalso Avenue atbang sa Cebu South Bus Terminal, V. Rama Avenue duol sa University of San Carlos-South Campus ug Osmeña Boulevard atubangan sa Nurses Home.
Sa Domingo, ang mga water stations anaa sa P. Del Rosario eskina Don. Pedro Cui, New Imus Road atubangan sa DepEd Building, New Imus Road eskina Lorega, New Imus Road eskina San Miguel, General Maxilom Avenue atbang sa daan nga Sacred Heart School for Boys, Gen. Maxilom eskina San Jose Extension, Gen. Maxilom sulod sa Fuente Osmeña Rotunda, Osmeña Blvd. atubangan sa Nurses Home, Osmeña Blvd. atubangan sa DOH-7, Osmeña Blvd. atubangan sa Harrison Park, Osmeña Blvd. atbang sa Camp Sergio Osmeña ug ubang bahin sa Osmeña Boulevard.
Gibutyag ni Kara ang paghatag nila og libreng limpyo nga tubig kabahin sa ila’ng corporate social responsibility sa kompaniya nga gibuhat nila matag tuig ug sa mga dagku’ng kalihukan nga ipahigayon sa Sugbo. (BANAT NEWS)
- Latest
