Fluvial procession kinahanglan og permit
CEBU, Philippines – Hugot nga ipatuman sa Philippine Coast Guard ang "No Permit, No Fluvial Policy" sa kalihukan sa kapistahan ni Senior Sto. Niño karong Sabado sa buntag.
Gipahibawo ni Cebu CG Station Commander Agapito Bibat ngadto sa organizing committee sa fluvial procession nga ila gyud sundon ug ipatuman ang kamanduan sa Memorandum Circular 04-2014 nga nagmando sa pagpakuha og permit alang sa fluvial procession nga dunay bayad nga P1,000.
Si Bibat kinsa niadto lang Oktubre nilingkod isip station commander nipadayag nga istrikto niya kini’ng ipatuman aron malikayan ang mga komplikado ug tulubagon panahon nga dunay mahitabo.
Giangkon sa mga sakop sa komitiba nga nabag-ohan sila niini kay sukad kaniadto wala na sila nagkinahanglan pa og permit.
Hinuon andam sila mosunod sa lagda.
Ang mga sakyanang pangdagat sama sa passenger vessels, motor banca ug uban pa ang kinahanglan mokuha og permit kun buot mosalmot sa fluvial.
Apan bisan pa man kun wala pa ang permit, giandam na sa CG ang mga pwesto sa mga mosalmot sa fluvial ug kun unsa ang ila’ng angay buhaton atol sa kalihukan.
Kini sama sa dili pag-over loading, wala’y ilimnong makahubog, mga hinagiban, mga pabuto ug balloons.
Kinahanglan nga adunay life jackets ang matag sakyanang pangdagat alang sa mga mosakay.
Nasuta nga tulo pa lang ka sakyanang pangdagat ang nipahibawo sa CG nga mosalmot sa tinuig nga fluvial procession karong Sabado.
Matud ni Bibat nga karong Huwebes ang deadline alang sa registration tungod kay sa adlaw'ng Biyernes ipahigayon ang briefing sa tanang mosalmot.
Sa Sabado kinahanglan nga sa alas 5 sa buntag anaa na ang mga mosalmot nga sakyanang pangdagat sa assembly area ubos sa Mandaue-Mactan Bridge. – /GMR) (BANAT NEWS)
- Latest
