Sinulog sa Mambaling sa Pebrero na
CEBU, Philippines – Gisibog sa una’ng Domingo sa Pebrero ang Sinulog sa Mambaling nunot sa pagpahigayon sa Closing Mass sa 51st International Eucharistic Congress sa Statio Orbis sa may South Road Properties nga nahimutang sa barangay.
Gawas niini, ang Archdiocesan Shrine of San Roque sa Mambaling ang usa sa 14 ka parokya nga mohimo og Parish Encounter nga kabahin sa kalihukan sa IEC.
Matud ni Barangay Kapitan Wilfredo Go nga sa Pebrero 7 na ang Sinulog sa Mambaling aron hawan ang dalan sa Enero 31 kanus-a himuon ang katapusang Santos nga Misa sa IEC nga gilauman nga hugupan sa mga Mambalinganon.
Gipadayag ni Go nga hugot karon ang ila’ng coordination sa Archdiocesan Shrine of San Roque nga gipangulohan sa kura paruko nga si Fr. Miguelito "Pads Do" Sarmago alang sa kalampusan sa mga kalihukan nga mahitabo sa Mambaling.
Gipaneguro sa kadagkuan sa barangay ug parokya ang malinawon ug mabungahon nga pag-host sa mga delegado.
Giawhag usab ni Go ang katawhan sa Mambaling nga mosuporta ug motabang sa pag-ampo alang sa mao’ng kalihukan tungod kay dili pa masayran pila pa ka tuig una kini mahitabo pagbalik sa Pilipinas.
Makig-alayon usab sila karon sa kapolisan, Cebu City Transportation Office ug SM Seaside City alang sa kausaban sa Sinulog sa Mambaling. – /GMR) (BANAT NEWS)
- Latest
