Kaso batok ni Mayor Rama gi-dismiss sa Ombudsman
CEBU, Philippines – Gibasura sa Ombudsman-Visayas ang kaso nga gipasaka batok ni Mayor Michael Rama ug sa kanhi konsehal sa Barangay Pahina San Nicolas tungod sa pag-isyu og sakyanan direkta ngadto sa konsehal ug dili ngadto sa barangay kapitan.
Ang mipasaka og kaso nga paglapas sa Anti-Graft and Corrupt Practices Act ug Grave Misconduct mao sila si Kapitan Antonio Caruzca ug mga konsehal sa Barangay Pahina San Nicolas. Nagtuo sila si Kapitan Caruzca nga nakahimo’g supak sa balaod si Mayor Rama tungod sa pag-isyu og sakyanan ngadto ni Konsehal John Paul Go ug wala kini giisyu ngadto sa barangay.
Matud sa kapitan nga ang Toyota Hilux nga gipalit sa City Hall ug alang unta sa ilang barangay, gigamit-gamit lang sa personal ni Konsehal Go ug gani tua kini i-parking sa ilang panimalay.
Ang kapitan miingon nga ang City Hall migahin og labing menus P1 ka milyon nga budget sa matag barangay aron ipalit og service vehicle, apan matud ni Caruzca nga wala silay sakyanan nga nadawat.
Gimandoan ni Kapitan Caruzca si Konsehal Go nga itugyan sa barangay ang sakyanan apan wala kini motuman, mao nga gipasakaan kini og kaso sa Ombudsman.
Matud ni Konsehal Go nga ang sakyanan giisyu kaniya kay siya man maoy tsirman sa Anti-Illegal Drugs Committee. Matud ni Go nga dihang napupos na ang iyang termino pagka konsehal, gitugyan niya balik sa City Hall ang sakyanan.
Si Ombudsman Graft investigator Ma. Bernadeth Andal-Subaan miingon nga walay basehanan nga padak-on pa ang kaso. (/RUB) (BANAT NEWS)
- Latest
