Tindera misalig ni Santo Niño

CEBU, Philippines – Ang tindera nga si Marieta Andrino miingon nga gipanalanginan gayud ni Santo Niño ang iyang ginagmay’ng panginabuhi kay kanunay man siya nga nag-ampo kaniya. Ang 44-anyos nga si Andrino, lumad nga taga Medellin ug kasamtangang nagpuyo sa Barangay Gun-ob, Lapu-Lapu City, misaysay nga naglisod sila sa panginabuhi sukad nga nawad-an og trabaho niadtong 2002.

Panday lang ang iyang bana ug dili pirme ang trabaho. Usa ka higayon nga misimba si Marieta sa kapistahan ni Santo Niño, iyang nahunahunaan ang pagpaninda apan wa siya’y puhonan kay P100 lang ang iyang kuwarta niadtong higayona.

Sa simbahan, gisugid niya kang Santo Niño ang iyang problema ug nangindahay nga tabangan siya nga makapaninda atol sa iyang kapistahan.  

Human sa iyang pagsimba, misuroy si Marieta sa Carbon Area ug maoy nakabig sa iyang pagtagad sa giladlad nga mga paypay nga giilogan sa pagpalit sa molabay nga mga tawo kay init man kaayo niadtong adlawa.

Gigamit niya ang P100 niyang kuwarta pagpalit og paypay ug mibalik siya sa simbahan ug gibaligya ang iyang dalang mga paypay. Kadali ra nga nahurot ang iyang mga paypay ug nagbalikbalik siya sa pagkumpra ug gabii na siya nga mipauli sa ilang panimalay dala ang P1,500 gikan lang sa iyang P100 nga puhonan. Pagkasunod adlaw, mao gihapon ang iyang gihimo ug nakaangkon gayud siya og dako nga ginansya. (/RUB) (BANAT NEWS)