Merkado sa Tabunok, hugaw, baho
CEBU, Philippines – Daghan ang nakasaway sa kahugaw karon sa merkado sa Tabunok, Dakbayan sa Talisay tungod sa nagtipun-og nga basura nga wala gikolekta.
Kasagaran sa nipadayag sa sentimento mao ang mga mamalitay ug ingon man ang mga tawo nga mag-agian sa nahisgutang lugar.
Si Talisay City Mayor Johnny de los Reyes sa pagpakighinabi sa Banat News nikompirmar gyud sa kahugaw ug kabaho sa nahisgutang lugar apan siya nipasabot nga tungod kini kay wala’y igo’ng gidaghanon sa mga trabahante nga molimpyo sa lugar.
"Ngano’ng dili man mahugaw nga 10 ra man ka sweepers ang naa diha nga unta 50 mana kabuok. Niya dili man mahimo nga manguha ta og daghang molimpyo kay kinsa man ang mosweldo," matud ni JVR.
Siya nagkanayon nga gamay ra gyud ang budget nga gihatag sa konseho.
Matud pa sa mayor nga ang ubang basura nakuha na apan ang kabaho nagpabilin hinungdan nga siya nimando sa kabomberuhan nga pasiritan og tubig ang gipunduhan sa mga basura.
"Og mahimo gani moapil ko og limpyo," asoy ni JVR.
Ang gidaghanon sa basura nagtapok gumikan sa taas nga bakasyon.
Samtang si Bise Mayor Romeo Villarante nagkanayon nga dili unta mamasangil ang mayor sa konseho tungod kay wala nila laslasi ang budget para sa basic services.
Sigun pa ni Villarante nga naa na sa mayor kung unsaon niya paghan-ay ang mga tawo nga gipatrabaho sa siyudad.
"Kini mao'y usa sa mga panghitabo nga nagpakita sa ka wala'y kabangkaagan sa mayor," matud ni Villarante. (Gabriel C. Bonjoc/GMR)(BANAT NEWS)
- Latest
