Piyansado nakuhaa’g P1.2M shabu
CEBU, Philippines – Kapin sa P1.2 milyon nga balor sa shabu ang nasakmit sa kapolisan human sa buy-bust operation pasado alas-5 sa miaging hapon sa Sitio Baho, Barangay Calamba sa dakbayan sa Sugbo.
Naposasan si Mark Ryan Alpante, 21, sa mga sakop sa City Intelligence Branch sa Cebu City Police Office human nga gipalitan siya sa usa ka poseur-buyer bali’g P900 nga shabu.
Ang hepe sa CIB, Superintendent Romeo Santander, nga nahinabi sa Banat News miingon nga ang pagkasikop sa suspek resulta sa ilang tulo ka semanang surveillance operation.
Siya mibutyag nga gipanid-an dayon nila ang suspek human nga may mitaho kanila nga nibalik kini pagpamaligya og drugas human nga nakapiyansa sa kasong paghupot og ginadiling drugas. Siya nadakpan niadtong tuig 2012 human nakuhaan kini og shabu ug nangangkon niini nga “errand boy” lang siya.
Apan sa miaging hapon wa na gyud makaipsot ang suspek tungod kay siya g’yud mismo ang napalitan og tulo ka putos sa shabu nga tag P300 ang pakete.
Dugang pa ni Santander dihang nasikop na ang suspek nakuhaan siya og 14 ka medium packs; 74 small packs; usa ka 9mm caliber pistol ug duha ka airsoft rifles.
Dugang ni Santander nga ang nakompiskar nga shabu mokabat sa P1.2 milyon base sa Dangerous Drugs Board estimates.
Ang suspek usa ka level two drug pusher nga makabaligya og 200 grams o P2.3 milyones nga shabu matag semana..
Dugang ni Santander ang maong operasyon resulta sa kamandoan ni Police Regional Office 7, Chief Superintendent Manuel Gaerlan, nga maghimo og konkreto ug dinagkong operasyon batok sa ilegal nga drugas. (Bryner L. Diaz/EIM)(BANAT NEWS)
- Latest
