PHO: Amping sa balanghoy

CEBU, Philippines - Nipahimangno ang hepe sa Provincial Health Office sa Sugbo nga ayuhon pagluto ang balanghoy kung kini kaunon aron dili malanag.

Kini human tulo ka bata kinsa usa niini namatay human nalanag sa gikaon nga balanghoy niadto’ng Martes sa gabii sa Barangay Balaygtiki, Lungsod sa Dumanjug.

Si Dr. Cynthia Genosolango nagkanayon nga wala’y mga advisory nga gidili ang pagkaon sa kamoteng kahoy apan kinahanglan kining tarungon sa pagluto.

Matud ni Genosolango nga ang balanghoy adunay “cyanide toxic” ug makamatay gyud kini hinungdan nga kinahanglang tarungon kini sa pagluto.

Usa sa biktima nga si Noven Monteza, 6-anyos, namatay samtang ang iyang duha ka igsuon nga sila si Marilyn, 9 ug Dexter, 2, ang nadala sa Barili District Hospital.

Giingong ang mga bata nireklamo nga gisakitan sa tiyan ug nagsige og suka. Gikan sa Barili District Hospital ang duha ka bata gibalhin sa Cebu Provincial Hospital sa Dakbayan sa Carcar.

Gipasusi na sa PHO sa mga epidemiologists ang insidente. (BANAT NEWS)