Di gugma ang pagpangdagit — Palma
CEBU, Philippines - Si Cebu Archbishop Jose Palma nalipay sa tinguha sa call center agent nga nanagit og bata nga makabaton kini og anak aron iyang panggaon ug aron makabaton siya og kaugalingong pamilya, apan matud pa sa arsobispo sayop ang pamaaging iyang gipili.
Kini maoy panahom ni Palma dihang gikuhaan sa Banat News kabahin sa gibuhat ni Melissa Londres pagdagit sa masuso diha sa Vicente Sotto Memorial Medical Center aron makaangkon kini og kaugalingong pamilya ug mapalig-on ilang relasyon sa uyab.
Matud pang Palma sayop kini nga pamaagi kay sama sa pagpangidnap ug supak sa balaod ang pagdagit og bata.
Sumala pa ni Palma, sa gibuhat ni Londres wa nay gugma nga nipatigbabaw kaniya. Tambag ni Palma, kung ganahan gayud makabaton og anak si Londres mahimo man unta siya mosagop og bata sa legal nga paagi.
Si Londres miangkon nga maong iya kadtong nabuhat tungod sa dako niyang gugma ngadto sa uyab kay di siya gusto nga buwagan niini mao nga nagpakaaron-ingnon na lang siyang nanganak ug ang bata maoy iyang gigamit.
Samtang nadawat na sa impormante nga nakatabang sa pagkabawi sa masuso ug pagkasikop sa suspek ang P100 mil cash reward gikan sa VSMMC.(Rowena Capistrano, Decemay Padilla, Ma.Fatima Secuya ug Brenda D. Batuto/EIM)
- Latest
