Di babag ang kakulian sa lawas

CEBU, Philippines - Dili babag sa ilang debosyon ang kakulian sa ilang panglawas aron mahimo ang ilang mga panaad ngadto sa Senyor Sto. Niño matud pa sa duha ka persons with disabilities nga nikuyog sa prosisyon sa Walk with Jesus kagahapon sa kaadlawon atol sa pagbukas sa unang nobenaryo sa kapistahan niini.

Liboang mga deboto ang nanguyog sa prosisyon nga nanukad gikan sa Fuente Osmeña Rotunda hangtud sa Basilica Minore del Sto. Niño.

Si Julio Potencioso, 50 anyos ug nagpuyo sa dan P. del Rosario adunay pito ka anak nitambong sa prosisyon bisan nagsakay og wheelchair.

Sa pakighinabi sa Banat News kang Potencioso iya nang panaad kaniadto pa ang pagkuyog sa prosisyon agi og pagpasalamat sa mga grasyang nadawat sa iyang pamilya.

Si Potencioso deboto ni Santo Niño sulod na sa 30 ka tuig ug padayon gihapon sa iyang debosyon.

Samtang si Maria Joana Evangeline Geograpo usa ka kawani sa Cebu City Hall adunay sakit nga polio ug diabetic ang nitambong sa nobenaryo bisan og naggamit siya og saklay sa usa ka kamot ug usab imahen sa Senyor Sto.Niño sa pikas kamot.

Matud niya 3-anyos pa siya dihang naigo sa maong sakit apan gikan pa niadto deboto na siya sa Senyor Santo Niño ug mokuyog gyud siya kaniadto sa prosisyon dihang madala pa sa iyang pikas ang iyang timbang.

Apan tulo ka tuig na ang nakalabay, dili na niya makaya pang molakaw og layo mao nga naputol ang iyang pagkuyog sa prosisyon ug modiretso na lang siya sa basilica.

Apan bisan pa niini, wala makuhai ang iyang debosyon ngadto sa Balaang Bata. (BANAT NEWS)