Di makamaong mokwenta?

CEBU, Philippines – Ang technical working group (TWG) sa heavy equipment nga gi-bidding wala magkadimao ang kwentada sa conversion sa kilowatt ngadto sa horse power (HP) sa makina sa dump truck.

Si Bokal Grecilda Sanchez, chairman sa Ad-Hoc committee sa hunta probinsiyal nagkanayon nga duna silay nakitang sipyat sa TWG sa kwentada sa conversion sa kilowatt ug HP ug mao kini gibasehan sa pag-disqualified sa laing bidder. Ang gi-require sa probinsiya  nga gikusgon sa makina 100 HP.

Giklaro ni Sanchez nga sa ubang mga unit sa heavy equipment wala silay nakitang problema gawas lang sa dump truck diin imbes ang pilion kadtong dagko og  makina aron kusgan kini ilabi na kung duna kini karga ug mosaka sa bukid.  Ang gipili hinuon kadtong gamay og makita unya daku og kaha. Ang TWG nagkanayon nga ilang gilantaw nga kung gamay ang makina gamay usab ang konsumo sa krudo komparar sa dako og makina ug makadaginot niini ang probinsiya

Apan  matud ni Sanchez wala tan-awa sa TWG nga posibleng maguba dayon ang mga pisa sa dump truck kung gamay ang makina tungod kay mabug-atan kini sa karga , kalas na kini og krudo.  Gawas niini dali lang kaayo maguba ang makina tungod kay magsige man kini og utong kung mabug-atan sa karga.

Matud ni Sanchez nga buot nilang paesplikahon niini ang mga miyembro sa TWG nga mipili kini sa dump truck nga dunay 160 HP lang nga makina kompara sa laing gitanyag nga 240 HP ang makina.

Gipasabot ni Sanchez nga kung kahibawo ang engineer nga nag-evaluate sa bid dili gyud kini masayop tungod kay mahisama lang kini og Bibliya kaniya. Gibutyag ni Sanchez nga imbes ang factor nga gamiton division ang gigamit sa engineer sa TWG multiplication hinungdan nga ang resulta gamay ang HP sa gitanyag nga dump truck sa Civic Merchandising Inc. kinsa usa sa mga bidders.

Ang Bids and Awards Committee (BAC) mi-disqualified sa Civic tungod kay giingong 74 HP lang ang gitanyag niini nga gikusgon sa makina.

Apan ang Civic mireklamo ug miinsister nga  99 kilowatts ang gisumitir niining gikusgon sa makina ug kung i-divide kini sa .746 (constant) ang resulta 132 HP. Apan ang kwentada nga gihimo sa TWG ang 99 kilowatts gi-multiply kini og .746 mao  ang resulta 74 HP.

Ang Ad-Hoc duna pay mosunod na nga mga meeting kabahin sa maong problema ug matud ni Sanchez nga paningkamutan nila nga mahuman na ang ilang report sa dili pa ang unang session nila niining tuiga karong Enero 18, 2016. Ang maong sayop nabantayan human ang Civic mireklamo ug mihatag usab kini og factor kung unsaon sa pagkwentada sa conversion sa gikusgon sa makina. – /EIM) (BANAT NEWS)