Mayor JVR mihangyo papasaron ang budget

CEBU, Philippines – Nakigkita si Mayor Johnny de los Reyes uban sa iyang anak nga si city administrator sa  mga konsehal nga sakop sa Alayon Party kinsa maoy mayoriya sa konseho sa siyudad sa Talisay ug mihangyo nga ipasar na ang budget nga iyang gipangayo karong tuiga sa di pa ang election ban karong Marso.

Ang  duha naabtan sa mga tigbalita diha sa opisina ni Konsehal Edward Alesna, kinsa chairman sa Finance Committee.

Matud pa sa mayor nga andam siyang ipaapil ang Legislative Assistance Fund (LAF) sa mga konsehal kun di nila tibhangan ang budget nga iyang gipangayo.

"Walay problema nang LAF kay para sa tawo ra man pud na at the same time mahatag sab nila ang budget before election ban kay useless man pud," matud pa sa mayor.

Apan duha lang sa mga konsehal nga sakop sa Alayon ang gikatagbo sa mayor nga mao sila si Alesna ug Konsehal Antonio "Jojo" Bacaltos.

Nipasabot si Alesna nga nakalitan sila sa pagbisita sa mayor apan niklaro kini nga di niya sakop ang hunahuna sa iyang mga kaubanan ug wa niya pasaligi ang mayor kun ilaha bang sanungon ang iyang hangyo.

Ang konseho ang naglaraw nga ilang ibalik ang proposed budget sa mayor nga mokantidad og P823 milyones kapin o kulang sa rason nga wa gilakip niini ang LAF.

Ilaha usab nakita nga aduna gihapoy gisukip ang mayor nga budget alang sa sweldo sa daghan kaayo niini nga job order employees. – /EIM) (BANAT NEWS)