MyBus di maka pick-up og pasahero
CEBU, Philippines – Gipahibawo ang publiko nga ang mga MyBus nga namasahero sa mga siyudad sa Metro Cebu dili mopasakay og pasahero gawas sa ilang mga stations. Kini ang gipahibawo ni Land Transportation Franchising and Regulatory Board-7 Director Reynaldo Elnar.
Matud niya nga ang maong mga bus anha lang mopasakay ug mopakanaug sa ilang pasahero sa station nga naglakip sa Dakbayan sa Talisay ug SM Seaside sa South Road Properties.
Ubang station anaa sa SM City Cebu, Park Mall sa Dakbayan sa Mandaue ug Mactan-Cebu International Airport.
Giklaro ni Elnar nga ang mga PUJ drayber o ang publiko nga makamatikod nga mopasakay og pasahero ang MyBus gawas sa station mahimo kining ireklamo sa ilang buhatan.
Ang walo ka MyBus nga kasamtangang nagdagan gihatagan lang og temporary permit hangtud sa Marso 31 samtang makadagan na usab ang 77 pa ka yunit nga nakakompleto na sa mga gikinahanglang rekisito. – /GMR) (BANAT NEWS)
- Latest
