Sesyon sa konseho nagkatensyon

CEBU, Philippines – Mitumaw ang tensyon sulod sa Session Hall sa Cebu City atol sa gipahigayon nga unang sesyon karong tuiga human nagkainitay sila si Konsehal Gerardo Carillo ug Konsehal Alvin Arcilla kalabot sa quorum niadtong Disyembre 16 sa miaging tuig.

Gikwestyon ni Carillo ang minutes nga gibasa sa Sangguniang Secretary nga nag-ingon nga adunay quorum nga nakab-ot niadtong Disyembre 16, matud pa ni Carillo nga ang quorum sa City Council kinahanglan napulo ka konsehal gikan sa 18 ka sakop niini.

Apan si Arcilla nangayo og kompleto nga listahan sa nitambong sa session sa maong adlaw ug nasuta nga 13  lamang ka mga konsehal ang nitambong apan nasayran nga ang upat niini wa maapil sa roll call tungod kay uwahing naabot. Ang upat nga wala maapil mga sakop sa Team Rama.

Aron pagputol sa tensyon si acting vice mayor Nestor Archival mideklarar dayon og recess, apan human niini, giduol ni Carillo si Arcilla ug gipangutana kun unsay iyang problema?

Diha na miulbo ang panaglalis sa duha ka konsehal, dihadiha gipugngan sa ubang konsehal si Carillo ug gipatawag ang sergeant at arms uban sa usa ka polis ayha pa nikalma ang session hall.

Sa pagbalik sa sesyon, unang nihatag sa iyang privilege speech si Konsehal Mary Ann Delos Santos kabahin sa problema sa mga nasunogan sa Sitio Avocado sa Brgy. Lahug.

Sunod nga nag-speech si Konsehal Alvin Dizon diin kini mipadayag  og kahiubos sa matud pa mando nga ipaaresto sila tungod lang kay wala sila motambong sa special session bahin sa Supplemental Budget No. 1 nga gipatawag sa mga konsehal sa Team Rama.

“This is why I was personally hurt and humiliated by an arrest order reportedly issued against me and the other councilors during a supposedly special session of the Cebu City Council last December 28, 29 & 30,”matud ni Dizon.

Matud niya, hasta iyang pamilya naapektahan sa maong mando.

Apan si Carillo sa iyang bahin miklaro nga imbitasyon ang ilang gihimo ni Konsehal Dave Tumulak pinaagi sa pag-adto sa tagsatagsa ka buhatan sa mga konsehal.

“We did not say they will be arrested, we just want them to attend,” dugang pasabot ni Carillo

Apan sa dihang gitagsa-tagsa og adto ang mga buhatan sa mga konsehal wala silang tanan didto hinungdan nga gitapos ang sesyon nga wala matuki ang SB No. 1. – /EIM (BANAT NEWS)