Lapu-Lapu lukpon og CCTV

CEBU, Philippines – Gitambungan sa mga representante sa business sectors, eskuwelahan ug mga opisyal sa barangay ang una’ng public consultation sa Lapu-Lapu City Council labot sa pagtaud og closed-circuit television (CCTV) camera.

Ang ordinansahon gipangamahanan ni Konsehal Jose Dungog, presidente sa Association of Barangay Councils sa siyudad.

Wala’y nisupak sa gihisgutang ordinansahon apan adunay mga sugyot nga gipadayag.

Si Daniel Pepito, safety and security head sa Rose Pharmacy, Inc., nagkanayon nga uyon siya nga mapasar ang ordinansahon tungod sa taas nga kaso sa pagpatay o pagpangawat.

Samtang si Kapitan Joseph Pangatungan sa Barangay Maribago nagkanayon nga maayo’ng ipangbutang sa mga strategic places sa dakbayan ang mga CCTV lakip ang pagbutang og tawo nga mo-monitor niini.

Si City Legal Officer Ethelbert Ouano niingon nga kung adunay CCTV daan ang nga establesemento, mo-require ang siyudad nga paandaron kini kapin sa 12 ka oras matag adlaw.

Adunay sunod nga public consultation nga himuon apan wala pa’y gihatag nga adlaw. – /GMR) (BANAT NEWS)