P250M re-bidding sa ekipo ipausab

CEBU, Philippines – Nisugyot si Bokal Sun Shimura nga ipausab ang bidding sa P250 milyones nga paliton nga heavy equipment sa Kapitolyo aron mawala ang pagduda nga may nakasapi niini.

Kini atol sa tigum sa Ad-Hoc Committee sa hunta probinsiyal kagahapon nga nisusi sa mga dokumento gikan sa Bids and Awards Committee labot sa bidding sa proyekto.

Nitumaw ang pagduda nga may nakasapi human ang ConEquip Phils. nga may labing mahal nga presyo ang gipadaug.

Si Gobernador Hilario Davide III sa iya’ng bahin nagkanayon nga depende na sa hunta probinsiyal kung unsa ang ila’ng desisyon.

Nipadayag hinuon si Davide sa iya’ng kasuko nga giapil–apil siya sa pasangil nga may nangomisyon sa pagpamalit sa heavy equipment.

“Kana man gud kay election lagi, padung na’ng election, nagkainit na atakihon ta, hasta ako atakihon ko nila nga nangomisyon si Davide, nakakwarta si Davide hasta ako’ng asawa apil-apilon, bastos kaayo na’ng ingon ana ba, kana nga accusations mga baseless kaayo, mga malicious kayo,” matud ni Davide.

Bisan pa man niini si Davide nipadayag nga daku gihapon siya og pagsalig sa BAC nga gipangulohan ni Provincial Administrator, Atty. Mark Tolentino.

Iya usab gihagit ang mga namasangil nga mopasaka og kaso batok sa BAC kung may nakita’ng binuang.

Samtang si Bise Gobernador Agnes Magpale nagkanayon nga ang ubang sakop sa hunta probinsiyal nihangyo nga motambong sa tigum sa Ad-Hoc Committee tungod kay buot sila’ng masayud sa botasyon.

Ang mga sakop sa hunta probinsiyal gihatagan og pagtugot sa pagpahigayon og imbestigasyon sa mao’ng isyu. – /GMR) (BANAT NEWS)