Mao diay nga hugaw ang Cebu City Jail kay…
CEBU, Philippines – Ang kapakyas sa pagbayad sa kapin sa tunga sa milyon ka pesos nga obligasyon sa pagmentinar sa waste water treatment plant diha sa Cebu City Jail maoy rason nga naproblema ang bilanggoan sa iyang kalimpyo. Bisan ang mga tagdumala sa bilanggoan mireklamo na tungod kay naproblema sila sa ilang waste water treatment facility. Ang mga ginamit nga tubig sa mga binilanggo, mahimong magamit pa pagbalik pinaagi sa waste water treatment plant.
Ang Mactan Rock Industries, Inc. maoy nagbutang og waste water treatment plant diha sa bilanggoan ubos sa kasabotan nga ang City Jail mopalit og labing menos 3,000 ka cubic meters kada buwan.
Si Arnulfo Sevilla, administrative officer sa Mactan Rock Industries, Inc. miingon nga miundang sila sa pagserbisyo sa City Jail kay wala kini makabayad sa obligasyon nga nagkantidad og P662 mil.
Sa iyang suwat nga gipadangat ngadto kang Acting Vice Mayor Nestor Archival ug Konsehal Dave Tumulak, si Sevilla mipasabot nga andam gihapon sila nga moserbisyo pagbalik kun mabayran na sila sa obligasyon sa bilanggoan nga subra sa tunga sa milyon ka pesos.
Ang tubig nga ma-treat sa waste water treatment plant mahimong gamiton sa paglimpyo sa mga pansayan ug uban pa nga kagamitan.
Ang isyu gipaabot nga tukion sa kadagkoan sa Police Coordinating and Advisory Council (PCAC) diin ang warden sa City Jail, miyembro niining maong kahugpongan. (BANAT NEWS)
- Latest
