Biktima sa demolisyon nagpatabang na sa City Hall

CEBU, Philippines – Napulo ka lumolupyo sa Barangay Caretta kang kansang kabalayan sulod sa Doña Pepang Cemetery midemanda karon sa Cebu City Hall nga hatagan na sila og hinabang salapi nga para kanila.

Ang nagpadala og sulat sa City Hall mao sila si Edwin Sulla, Rosalinda Lumbre, Wilfredo dela Peña, Rosaida Lumbre, Marcus Pilapil, Mary Ann Mesias, Annie Maglasang, Jackie Ramirez, Leonida Sumanting ug Rosita Lumbre.

Matud sa maong mga tawo nga sila naapektahan sa programa ni Mayor Michael Rama nga paghimo og Heritage Park diha sa karaang sam-ang nga gitawag kaniadto og Doña Pepang Cemetery.

Ang City Hall nagpadayon pa nga nanghawan sa kabalayan atubangan nga bahin sa menteryo nga gitukod sa luna nga kabahin sa sam-ang aron nga mamugna na ang usa ka heritage park.

Sa ilang suwat nga gipadala sa opisina sa mayor, ang hingtungdang mga lumolupyo miingon nga base sa lagda sila makadawat og tag P10 mil   matag usa tungod kay apektado man sila sa programa sa dakbayan.

Matud nila nga igo ra sila nga gibalhin sa City Hall ngadto sa usa ka lote nga gipanag-iya sa usa ka “Mr. Pantaleon” likud nga bahin sa Carreta Elementary School apan wala sila hatagi og disturbance pay.

Ilang gibatbat ang mga lagda base sa Republic Act 7279 kon Urban Development and Housing Act (UDHA) nga ang mga biktima sa demolition hatagan gayud og hinabang sa nagpademolis kanila.

Ang mao nga mga pamilya miingon nga adunay nagtug-an kanila nga tungod kay nabiktima sila sa sunog niadtong 2013 ug nahatagan na og tabang sa City Hall nga tag P10 mil, dili na sila mahatagan og disturbance pay.

Miinsistir ang maong mga pamilya nga obligado ang kagamhanan nga mohatag kanila og tabang sama sa ilang pagtabang sa uban. Ang City Council miawhag sa Office of the City Mayor nga tagdon kining reklamo sa hingtungdang pamilya. (BANAT NEWS)