Nasunogan sa Lahug namalik og tukod og balay

CEBU, Philippines – Walo ka adlaw human sa nahitabong sunog, nagsugod na kagahapong adlaw og tukod pagbalik sa ilang mga panimalay ang mga nasunogan sa Sitio Avocado, Brgy. Lahug ning Dakbayan sa Sugbo tungod magsugod na usab ang klase sa Lahug Elementary School diin sila temporaryong nagpuyo sukad sa nahitabong sunog niadtong Disyembre 26.

Ang pagtukod nila pagbalik sa mga balay subay kini  sa mando ni acting mayor Edgardo Labella nga pabalikon gyod ang mga nasunogan bisan og wala pa maresolba ang isyu sa kagamhanan ug sa tag-iya sa yuta nga mao ang University of the Philippines-Cebu.

Karon usab adlawa magsugod og balik ang klase sa Lahug Elementary School hinungdan nga gipadali ni Labella ang paghatag og lot allocation sa mga nasunogan.

Matud ni Collin Rosell, pangulo sa Division for the Welfare of the Urban Poor, nga naggahin og 70 ka espasyo ang siyudad alang sa mga structure owners sa nasunogan.

Matud ni Rosell nga 59 ka pamilya ang partial nga nahatagan og 34 square meter nga lot allocation.

Sa 200 ka mga pamilya, ang 59 pa ang nakapamatuod nga nakatag-iya sila og structure sa maong luna. Matud niya nga magbutang sab og kapilya ug public comfort room ang siyudad sa maong luna.

Karong semanaha makig-estorya ang siyudad sa administrasyon sa UP-Cebu tungod sa kagubot niini niadtong December 31, 2015 human mibisita ang representante sa eskwelahan ug mipadayag nga gusto na nilang gamiton ang luna sa UP.

“Within the week, makig-estorya ta. It is just a continuation sa atong estorya before, years ago. They have agreed, in the presence of Mayor Michael Rama, that they have to be specific nga naa ba sa ilang project component ang matters sa occupants living in their property where the building nga ilang gi-propose will be constructed. Wala na nila ma-address,” sigon ni Rossel.

Sa laing bahin, adunay magpabilin nga mga sharers ug renters sa eskwelahan samtang wala pa silay kabalhinan. – /EIM) (BANAT NEWS)