V-Hire Terminal ibalhin una
CEBU, Philippines – Temporaryo nga ipahiluna sa luyo sa Senior Citizen’s Park ang mga V-Hire nga kasamtangang anaa duol sa Compania Maritima aron paghatag og luna sa Devotees City sa umaabot Sinulog.
Matud ni Cebu City Transportation Office (CCTO) executive director, Atty. Rey Gealon, nga temporaryo ang pagbalhin aron paghatag og lugar alang sa mga deboto nga gilauman nga moabot kun magkaduol na ang pagsaulog sa Sinulog karong buwana.
Dugang ni Gealon nga magpabilin gihapon ang “first come, first serve basis” sa pag-parking sa mao’ng dapit.
Hinuon gipasalig ni Gealon nga bisan pa man nga anaa temporaryo nga gibutang sa luyo sa Senior Citizen’s Park ang mga V-Hire maka-accommodate gihapon kini sa mga pribado nga sakyanan nga maka-park nga adunay mga personal nga transaction sa City Hall.
Samtang si Konsehal Roberto Cabarubias, chairman sa Devotees City, nagkanayon nga sugdan na nila ang pagpanglimpyo sa Compania Maritima ground. Dugang ni Cabarubias nga sugod sunod semana sugdan ang pagpanghakot sa 130 ka container vans nga gamiton gikan sa 2GO Shipping Lines nga mao’y mohatag sa kapuy-an sa mga deboto gikan sa nagkalain-laing probinsiya nga mosalmot sa kapistahan ni Senior Santo Niño.
Gilauman usab nga mas sayo nga mangabot ang mga deboto karong umaabot nga Sinulog.
Daghan usab nga mga stakeholders ang moabag para sa mga deboto nga sama sa gibuhat sa mga niagi’ng Sinulog. (BANAT NEWS)
- Latest
