P25 mil shabu, armas nasakmit sa buy-bust
CEBU, Philippines – Nasikop sa kapolisan ang suspetsadong drug pusher kinsa nakuhaan og P25 mil nga kantidad sa shabu ug armas sa gipahigayong buy-bust operation pasado alas 6 niadtong Biyernes sa gabii sa Sitio Lantawan, Barangay Victoria, San Remigio.
Gipusasan si Edu Marianito, 21, ang subject sa buy-bust operation, dihang nibaligya siya og usa ka putos nga shabu sa usa ka police-poseur-buyer apan ang iyang kauban nga si Renante Paradero Sayloon apil nga gidakop sa kapolisan.
Sumala pa ni Police Officer 3 Dante Tiaño, desk officer sa San Remigio Police Station, nga pasado alas 6 sa gabii niaging adlaw nagpahigayon sila og buy-bust operation alang ni Marianito.
Dihang nagkasinabot na sila, gitunol sa poseur-buyer ang P300 nga buy-bust money aron sa pagpalit og usa ka pakete nga shabu ug niadtong tungora si Sayloon niapil sab sa transaksyon.
Dihang nagbinayloay na ang polis ug ang suspetsadong drug pusher dali nga nisinyas ang poseur-buyer sa iyang mga kauban kinsa daling nihamag sa suspek.
Gidakop ug gipusasan dayon sa kapolisan ang mga suspek ug human niana gisuhid nila ang mga suspek ug ang lugar nga ilang gibaligyaan.
Nakuha gikan sa subject ang usa ka pakete nga shabu ug ang P300 nga buy-bust money; 14 ka pakete nga shabu; ug kwarta nga bali’g P7,100.
Lakip sa nasakmit ang usa ka heat sealer ug usa ka kalibre .45 nga pistola nga may magazine ug bala.
Nitimbang og 6 gramos ang nasakmit nga shabu nga mobalor og P25 mil. (BANAT NEWS)
- Latest
