4 naigo stray bullet, 58 ang nabuthan

CEBU, Philippines – Upat ka tawo ang gikatahong naigo sa saag nga bala dinhi sa Central Visayas base sa inisyal nga talaan sa Regional Epidemeology and Surveillance Unit-7.

Si Renan Cimafranca, pangulo sa RESU-7 sa usa ka interbyu sa lokal nga sibyaanang dyRF mibutyag nga adunay tulo ka mga biktima sa stray bullets nga natala dinhi sa Cebu City.

Matud pa ni Cimafranca, sila gikan sa Brgy. Duljo Fatima, Talamban ug Pardo, Samtang ang usa gikan sa Baclayon, Bohol.

Sumala pa ni Cimafranca, niabot sa 62 ka tawo ang nabiktima sa pabuto ug saag nga bala. Mas daghan kini itandi sa nilabay nga tuig nga nakatala lang sila og 56 ka biktima lakip sa duha nga naigo sa saag nga bala.

Gibutyag ni Cimafranca, nga posibleng mosaka pa ang ihap tungod kay padayon pa man silang nanguha og mga datos gikan sa nagkadaiyang mga tambalanan sa rehiyon. Si Cimafranca nagkanayon nga kasagaran sa mga nabuthan nigamit og kwitis, fountain, judas belt, Piccolo, boga ug mga pulbora nga kalit misilaob.

Ang mga naigo sa saag nga bala dinhi sa Cebu City gi-admit pa sa mga tambalanan dinhi sa siyudad apan ang usa niini gipapauli na tungod kay dili man kaayo grabe ang naangkon. Si Cimafranca, nipadayag nga wala magkuwang sa pagpahimangno ang gobiyerno ug non-government organizations sa publiko batok sa paggamit og pabuto ug pagpataka og pabuto og armas.

Samtang sa Talisay City, usa ka bala ang nilusot sa atop sa usa ka panimalay sa Burgos St., Brgy. Poblacion, Dakbayan sa Talisay niadtong Biyernes sa buntag, pipila ka oras nahuman ang buto-buto sa pagsugat sa Bag-ong Tuig.

Si Francis Tayong, 52, midangop sa kapulisan ug gipahibalo nga aduna'y saag nga bala nga nitugpa sa ilang kusina.

Usa ka deformed slug gikan sa wa matino nga kalibre nga bala ang iyang nakita ug nabuslot na usab ang ilang kisame ug atop nga timaan nga diha miigo ang bala.  (BANAT NEWS)