Kapitolyo padayong manghatag sa cash incentives

CEBU, Philippines - Padayonon sa Kapitolyo karong tuiga ang pagpanghatag sa cash incentives sa mga barangay health workers, tanod, barangay animal health aide, barangay nutrition scholars ug day care workers.

Karong Enero 7 sa buntag ug hapon, ang Kapitolyo manghatag sa incentives sa Lungsod sa Carmen ug Dakbayan sa Danao.

Sa Enero 8 ang Lungsod sa Borbon, Sogod ug Catmon samtang sa Enero 13 sa Lungsod sa San Remigio, Tabogon ug Dakbayan sa Bogo.

Sa Enero 15 sa Lungsod sa Asturias, Tuburan ug Tabuelan samtang sa Enero 20, 22, 27 ug 29 sa Lungsod sa Dalaguete, Argao, Consolacion, Compostela, Liloan, Oslob, Boljoon, Alcoy,  Cordova ug Dakbayan sa Mandaue.

Sa Pebrero 5, 10 ug 12 sa Lungsod sa Bantayan, Madridejos, Santa Fe, Sibonga, Dakbayan sa Carcar, Lungsod sa San Fernando, Dakbayan sa Naga ug Lungsod sa Minglanilla. Niadto’ng Nobiyembre 28, 2015, nikabat sa 670 ka barangay workers sa Lungsod sa Balamban ang nakadawat og incentives.

Ang mga BHW, DCW, BNS ug BAHA nakadawat matag usa kanila og P2,400 samtang ang mga tanod matag usa kanila nakadawat og P1,500.

Si Elvira Ardiente, 44-anyos nga taga Barangay Ga-as, Balamban ug sulod na sa 13 ka tuig nga nagserbisyo isip BHW mapasalamaton sa probinsiya sa nadawat nila’ng incentives.

Matud ni Ardiente nga bisan og P1,000 lang matag buwan ang iya’ng madawat nga honorarium apan wala niya kini panumbalinga tungod kay kalipay niya nga makatabang sa ila’ng mga silingan. (BANAT NEWS)