Head guard gipatay

CEBU, Philippines - Gipusil patay sa wa pa mailhing tawo ang usa ka head security guard sa usa ka subdivision sa miaging hapon diha sa Anami Subdivision, Barangay Tungkil sa lungsod sa Minglanilla.

Patay na nga naabtan diha sa usa ka hilit nga bahin sa subdivision ang biktima nga si Renato Montejo Labandero, 49, sa Bisda Security Agency.

Si Police Officer 1 Lord Cañada, desk officer sa Minglanilla Police Station, miingon nga usa ka mason nga nailhan lang sa pangalan nga Roger maoy nakakaplag sa patay nga lawas sa biktima nga may samad pinusilan.

Busa iyang gipahibalo ang usa ka gwardya nga si Mark Anthony Sevilla nga maoy mipahibalo sab sa iyang igsuon nga si Abe.

Sa pagresponde sa kapolisan nasuta nga medyo kaging na ang lawas sa biktima apan nagkupot pa kini sa iyang P900 sa iyang kamot ug ang iyang pitaka ug ang cellphone wala ra mahilabti. Apan nasuta sa kapolisan nga wala na ang service firearm sa biktima nga shotgun ug kalibre .38 nga revolver ug aduna kini duha ka samad pinusilan sa buko-buko ug usa sa likod nga bahin sa iyang ulo.

Nakarekober ang kapolisan og kabhang sa bala sa kalibre .45 nga pistola sa crime scene. Gisusi pa kun adunay nakabingkil  o ba kaha giinteresan ang armas sa biktima.