Way nag-overcharging

CEBU, Philippines – Giawhag sa usa ka transport leader ang mga pasahero sa bus nga isumbong gyud kung dunay mga mag-overcharging ngadto sa mga otoridad aron sila masilotan. "Ako nanawagan ko nga kung kinsa to ang mabiktima aning overcharging sa mga buses to take note of the plate number. Kay ako mismo ang mo pasaka og complaint against nila sa Land Transportation Office," awhag pa ni Julieto Flores, tigpamaba sa Cebu Provincial Bus Operators Association.

Matud pang Flores bisan sa kadaghan sa mga pasahero diha sa north ug south bus terminals, wa pa silay nadawat nga reklamo nga adunay nag-overcharging.

Sugod kagahapon, namauli na pagbalik ang mga trabahante gikan sa mga siyudad balik sa ilang mga probinsya tungod sa Rizal Day ug sa pagsugat sa Bag-ong Tuig unyang gabii, gipaabot nga mamalik ang mga tawo sa dili pa ang Enero 4, 2016.

Si Rey Elnar, regional director sa Land Transportation and Franchising Regulatory Board-7 nagkanayon nga wa pa usab siya makadawat og reklamo gikan sa mga pasahero nga adunay nag-overcharging.

Sumala pa niya, kada adlaw adunay inspectors ang LTFRB nga nagsige og libot sa mga terminals aron moatiman sa mga reklamo sa mga sumasakay. Wa say nadakpan nga kolurom nga mga buses  base sa ilang gihimong inspeksyon. Subli niyang gipahimangnoan ang publiko nga ang mga kolurom buses dili moabaga sa gastos unya sa mga makalas o maangol kun kini maaksidente tungod kay wala man kini mga insurances.

Ubos sa Joint Administrative Order 2014-01, ang mga operators nga masakpang nipadagan og kolurom nga pasaheroan pamultahon og P1 milyon ug i-impound ang iyang bus unit. – /EIM) (BANAT NEWS)