Debosyon sa Eukaristiya maoy awhag ni Palma

CEBU, Philippines – Naglaom si Cebu Archbishop Jose Palma, nga mas mohugot pa ang debosyon sa mga Sugbuanon sa Eukaristiya atol unya sa mga kalihukan sa 51st International Eucharistic Congress (IEC) nga himuon karong Enero 24-31 tuig 2016.

Kini maoy New Year’s message ni Palma, dungan sa panghinaot nga unta, makita sa katawhan ang presensiya ni Kristo sa ilang kinabuhi. Mapasalamaton ang Arsobispo sa grasya sa pag-host sa Sugbo sa IEC sa sunod tuig.

Ang New Year’s message gibasa ni Msgr. Joseph Tan, Media Liaison sa Archdiocese of Cebu, nga diin nagpasalamat ang simbahan sa Ginoo tungod sa kaayo niini ug sa kaluoy nga iyang gipakita sa katawhan.

Si Palma mihulagway nga daghang mga butang ang angayang isaulog sa 2016, tungod kay kini maoy gideklarar kini nga Jubilee Year ug nahimong tipik ug kabahin sa siyam ka tuig nga preparasyon alang sa 500th anibersaryo  sa pag-abot sa  Kristiyanismo dinhi sa Pilipinas.

Nasuta nga saulugon sab sa Simbahan sa tuig 2016 ang Year of the Family and the Eucharist ug ang 25th anniversary sa “Convocation of the Second Plenary Council of the Philippines, the greatest ecclesial event in the Philippines in the twentieth century.”

Sa mga nagsingabot nga mga kalihukan, naglaom si Palma, nga pamalandongan sa mga Sugbuanon ang dagway sa kaluoy aron tiunay nga maangkon ang gasa niini isip usa ka pamilya ug komunidad.

Hinuon, dili kalikayan nga dunay moabot nga kasakit ug mga pagsuway sa umaabot nga Bag-ong tuig, apan matud pa ni Palma, dili kini rason aron mahanaw ang pagtuo sa katawhan ngadto sa Ginoo.

Dugang ni Palma nga unta, pinaagi sa pagpangaliya mohugot pa ang atong pagtuo taliwa sa mga moabot nga trahedya, mopasulabi pa gihapon ang gugma, pagsalig ug pagtuman sa mga maayong pagtulon-an. – /EIM) (BANAT NEWS)