Talisay mogamit na’g modernong traffic light

CEBU, Philippines - Gisugdan na sa pagtaod ang modernong mga traffic lights nga gipalit og P7 milyones sa kagamhanan sa dakbayan sa Talisay.

Ang pagpanaod sa computerized nga traffic lights sa Talisay gikatakdang mahuman duha ka buwan gikan karon. Gipaabot nga makatabang kini pagsulbad sa problema sa trapiko sa Talisay.

Sa sayo pa, ang konseho pinangulohan ni Bise Mayor Romeo Villarante nipasar  og budget nga kapin P7 milyones. Si Konsehal Valeriano Ylanan, ang tsirman sa City of Talisay-Traffic Operation Division Authority (CT-TODA), maoy misugyot sa maong gahin.

Si Konsehal Ylanan niingon nga moluag na unya ang dagan sa trapiko sa merkado sa Tabunok ug uban pang lugar sa Talisay kun hingpit na nga mahuman ang pagtaud sa modernong traffic light gikan sa eskina sa Barangay San Roque lahos na sa Tabunok ug Lawaan.

Matud ni Ylanan nga ang mga traffic enforcers nga gigamit sa pag-operate sa mano-mano nga traffic light makatabang na unya sa pag-monitor sa kadalanan ug modakop sa mga badlungong drayber nga mosupak sa balaod.

Ang konsehal miingon nga posible sa sunod buwan ila usab nga ipasar ang laing budget alang sa dugang traffic light ug paghimo unya og command center nga magbase sa Talisay City Hall. Gihulagway ni Ylanan nga ang modernong traffic light nga gipalit sa Talisay susuma sa traffic light sa siyudad sa Mandaue nga adunay timer ug camera.

Dugay na ang maong plano sa pagpalit og moderno nga traffic lights apan wala dayon kini napatuman.

Nalipay si Ylanan nga ang dugay na kaayo nga plano nahatagan na gyud og katumanan human kini gipasar sa konseho ang gikinahanglang budget. (BANAT NEWS)