“Snatcher” gikulata sa mga bugoy

CEBU, Philippines – Gidakop sa mga bugoy ug gitugyan sa mga polis ang usa ka drayber og “habal-habal” human siya gitumbok nga maoy milabni sa shoulder bag sa usa ka babaye didto sa Barangay Maguikay, dakbayan sa Mandaue kaniadtong Biyernes sa hapon. Si Ruben Alba, 35-anyos, nagpuyo sa Barangay Maguikay, gitudlo ni Mercy Uros, 38, nga misuway paglabni sa gidala niya nga shoulder bag.

Si PO2 Jay-R Galaben, sakop sa Presinto 4 sa Mandaue City Police Office (MCPO), misaysay nga ang biktima naglakaw paingon sa iyang gitrabahoan diha nga hilom kini nga gisunod sa suspetsado. Paglabni sa suspetsado sa bag sa biktima, abtik nga nakagunit si Uros sa sling sa iyang bag mao nga wala dayon kini makuha sa giingong snatcher.

Tungod sa kasikas, ang mga lumalabay nakamatikod ug midali kini sa pagduol hinungdan nga si Alba mikaratil sa pagdagan. Si Alba giingon nga gitabangan og kulata sa mga lalaki nga nakakita.

Ang mga sibilyan mao na ang mitugyan ngadto sa kapolisan aron ang suspetsado kapasakaan og kaso sa hukmanan. (BANAT NEWS)