Naghikog kay ang kapuyo nangita’g lain
CEBU, Philippines – Usa ka 34-anyos nga lalaki naghikog didto sa Sitio Malinao, Barangay Agus, dakbayan sa Lapu-Lapu kaniadtong adlaw sa Pasko tungod sa selos sa iyang kapuyo.
Si PO2 Marven Saraum sa Lapu-Lapu City Police Office miingon nga ang lawas ni Christopher Amistad napalgan na lang nga nagbitay sa punoan sa kahoy.
Usa ka nylon nga pisi ang gigamit ni Amistad sa paghikog. Matud pa nga si Amistad nasayod nga ang iyang kapuyo adunay laing lalaki nga gikarelasyon.
Matud pa nga si Amistad bag-ohay pa nga nakagawas gikan sa bilanggoan tungod sa kaso nga pagpangawat.
Sa wala pa naghikog si Amistad, gikataho nga nakigkita kini sa iyang kapuyo ug sa ilang anak.
Samtang, tungod sa utang naghikog ‘sab ang usa ka inahan didto sa Barangay La Paz, Bogo City kaniadtong Huwebes.
Nakaplagan na lang nga nagbitay sa punoan sa manga si Cecile Pedrano, 35. Ang anak sa namatay miingon nga ang iyang inahan kanunay miingon nga di na siya makaagwanta sa iyang problema.
Pagsusi sa kapolisan nakit-an nila ang suicide note sa namatay ug ang listahan sa iyang utang. (BANAT NEWS)
- Latest
