Deadline karon sa 13th month pay
CEBU, Philippines – Gipahinumduman sa Department of Labor and Employment-7 ang mga kompaniya sa katapusang adlaw karong adlawa sa pagpanghatag sa 13th month pay sa mga kawani.
Matud ni DOLE-7 Director Exequiel Sarcauga nga base sa balaud kinahanglan nga dili paabtan sa sunod tuig sanglit tumong niini nga may kuwarta ang mga trabahante nga mapalit panahon sa Pasko.
Sayo niini si DOLE Secretary Rosalinda Baldoz nimando nga mahatag na ang 13th month pay sa dili pa moabot ang Disyembre 24.
Gihulagway nga kun maabtan pa og Enero kalapasan na kini sa balaud ug wala na usab masunod ang tumong kun nganong gipatuman ang ingon nga pamaagi.
Nasayran nga ang kompanya nga mapakyas sa paghatag og 13th month pay sa ila’ng mga empleyado mag-atubang og silot.
Hinuon gipasabot sa DOLE-7 nga aduna sila’y proseso nga gisunod sama sa mga empleyado nga moadto sa ila’ng ahensiya aron moreklamo.
Ang DOLE-7 nag-monitor og mga reklamo labot sa wala paghatag og 13th month pay diin sa tuig 2014 niabot sa kapin 100 ka reklamo ang nidangat sa ila’ng buhatan ug sagad sa mga rason kay wala kahibawo, wala’y mopirma ug wala’y decision making.
Base sa guidelines sa DOLE, ang mga kompanya adunay mandato nga moduso og form isip “Proof of Payment of 13th Month Pay” subay sa balaud. – /GMR) (BANAT NEWS)
- Latest
