Priso, pamilya mag-uban 4 ka adlaw sa CPDRC

CEBU, Philippines – Ikauban sa mga piniriso sa Cebu Provincial Detention and Rehabilitation Center (CPDRC) ang ila’ng pamilya sugod karong adlawa aron sa pagsaulog sa Pasko.

Ang pamilya sa 2,720 ka piniriso sa CPDRC ang gitugutan nga makapuyo sa sulod sa upat ka adlaw.

Matud ni Marco Toral, consultant sa CPDRC, nga adunay Daygon Contest sa mga inmates, drama, liga sa basketball ug adunay disco diha sulod sa CPDRC.        Kini aron usab mahatagan og kahigayunan ang mga piniriso nga malipay ug malingaw uban sa ila’ng pamilya. Gipasabot ni Toral nga ang pagtugot sa mga piniriso nga makauban ang ila’ng pamilya maoy usa sa paagi nga ang usa ka piniriso mawagtang ang kaguol o depression niini. Ang mga pamilya sa piniriso lakip na ang ila’ng mga anak anha mangatulog sa quadrangle o sa hawanan sa prisohan.

Dugang ni Toral nga 75 ka lechon baboy ang ila’ng andamon alang sa pagsaulog sa Pasko.

Ang kwarta nga gipamalit sa ila’ng pagkaon lakip na niini sa mga lechon gikan sa kapunungan sa mga priso. Ang mga priso aduna’y natigum nga kwarta gikan sa ila’ng bakery diin matag buwan aduna sila’y P60 mil nga kita. – /GMR) (BANAT NEWS)