Isnabero nga taxi driver ipa-report

CEBU, Philippines – Gipaabot ang isnabero nga mga taxi drivers karong panahona diin mag-ilog ang mga pasahero.

Tambag sa Land Transportation Franchising and Regulatory Board sa publiko nga kun makasinati og ingon niini mahimo sila’ng moreklamo sa ila’ng buhatan. Nagkanayon si LTFRB-7 Director Reynaldo Elnar nga kanunay abli ang ila’ng buhatan alang niadto’ng mga aduna’y reklamo apan kini nitataw nga hangtud karon wala pa gyud sila’y nadawat nga reklamo.

Gitataw ni Elnar nga ang isnabero nga taxi driver mahimo’ng makamulta o kaha bawian sa ila’ng lisensiya kun dili sila magpasakay sa usa ka pasahero nga mopara kanila.

Gipasabot sa ahensiya nga kung ang usa ka taxi driver dili magpasakay kay aduna na’y pasahero nga nagpaabot niya, mokaon pa o makagarahe na kinahanglang magbutang sila og signage sama sa “On Call”, “Not Available”, ug “Garage” aron dili sila parahon.

Gihimug-atan usab ni Elnar nga kun ang usa ka taxi driver moingon og pakyaw ngadto sa iya’ng pasahero ug dili mogamit og metrohan, kalapasan kini sa balaud tungod kay angay gyud kini’ng gamiton isip tuyo sa pagbutang niini sa taxi unit. Ang multa sa una’ng kalapasan anaa sa P5,000; P10,000 sa ikaduha ug kanselasyon sa lisensiya sa ikatulo. Gumikan kay dili tanang taxi drivers ang napaubos sa Driver’s Academy hinungdan daghan pa ang wala masayud niini.

Gibutyag ni Elnar nga mahimo’ng motawag ang publiko sa ila’ng 24/7 hotline nga 1342 ug mopadala og text ug sa Viber sa numero nga 0917-550-1342 ug 0998-550-1342 sa mga reklamo.

Samtang hangtud kagahapon aduna na'y 85 ka special permits ang na-isyu sa LTFRB alang sa mga bus nga mobiyahe sa dili nila rota karong panahon sa Pasko.

Aduna'y 44 ka permits alang sa habagatang bahin sa Sugbo diin sagad niini sa Lungsod sa Santander ug 41 sa amihanang bahin sa Sugbo diin sagad niini paingon sa Daanbantayan, Hagnaya ug Isla sa Bantayan. – /GMR) (BANAT NEWS)