Pagsunog og ligid atol sa pasko makadaot
CEBU, Philippines – Niawhag ang Department of Environment and Natural Resources (DENR)-7 sa publiko nga dili magsunog og ligid diin isugba ang mga pabuto atol sa pagsugat sa Pasko lakip na sa Bag-ong Tuig ug adto lang kini himuon sa gitugot nga lugar. Tumong niini alang na sa kaluwasan sa tanan ingon man dili kini makahatag og kadaot sa kalikupan sumala pa ni Isabelo Montejo, Regional Director sa DENR-7.
Matud pang Montejo grabe ang epekto sa baga sa aso nga gikan sa gisunog nga ligid kun masimhot sa tawo gawas pa sa peligro sa paggamit og pabuto.
“This would translate to lesser or fewer occurrences of fires injuries and even deaths while we celebrate one of the most cherished traditions among us Filipinos”, asoy ni Montejo. Nanawagan usab ang ahensiya og mas istriktong implimentasyon sa pagpamaligya og pabuto, pag-manufacture, distribution ug paggamit sa mga pabuto nga gi-regulate sa Republic Act 7183.
Matud pa niya seryuso ang epekto sa greenhouse gases sa pabuto, carbon dioxide, carbon monoxide ug nitrogen dioxide. Base sa labing uwahi nga monitoring sa Department of Health (DOH)-7, wala pa sila'y natala nga nabiktima sa pabuto.
Nagkanayon si Rennan Cimafranca, Panu sa Regional Epidemiology and Surveillance Unit (RESU)-7 wala pa sila'y natala nga nabiktima sa pabuto hangtod kagahapon sukad nga nagsugod ang ilang kampanya sa “Oplan Paputok.”
Samtang ang Cebu City Medical Center, 100 porsiyento nang andam sa kapaskohan sumala pa ni Atty. Rey Chris Panugaling, pangulo sa Hospital for Administration nga nahinabi sa Banat News. Andam na usab ang mga tambal ug hiraminta paggamit kun adunay mabuthan atol sa kasaulogan sa Pasko ug Bag-ong Tuig.
Ilang napanglantawan nga posibleng modagsa ang mga biktima sa pabuto sa pagsugat na sa Bag-ong Tuig tungod kay dili man kaayo daghan ang sa Pasko sama sa mga nangaging katuigan. Sukad pa niadtong Disyembre 1, gipatuman na nila ang Code White alert sa CCMC diin wala nay gitugotan sa mga staff nga mo-absent o mo-leave of absence aron masiguro nga maatiman dayon ang mga pasyenteng mabuthan aning kapaskohan. Sa samang higayon, giawhag ni Konsehal Dave Tumulak ang katawhan nga di magpataka og pabuto sa dili designate firecracker area sa ilang barangay. – /EIM) (BANAT NEWS)
- Latest
