Pawikan nikubit sa pasol
CEBU, Philippines – Usa ka dakong pawikan ang nakit-an sa mananagat didto sa Barangay Tanke, dakbayan sa Talisay kagahapon sa buntag.
Si Superintendent Germano Mallari, hepe sa kapulisan sa Talisay niingon nga si Constantino Ramos nanagat sa may lungsod sa Cordova.
Siya nahibung kun nganong bug-at ang iyang pasol ug sa iyang pagsusi nahingangha kini nga usa ka pawikan ang iyang nakuha.
Gibanabanang 20 kilos ang gibug-aton sa pawikan. Si Mallari nagkanayon nga niresponde ang kapulisan sa maong lugar apan ang grupo sa Guardians of the Sea ug si Ramos ang nakaestorya na sa taga Bureau of Fisheries and Aquatic Resources nga adto kini nila i-turnover.
Asoy pa ni Mallari nga ang taga BFAR na ang mohimo sa dokumentasyon ug posibleng ibalik ra ang pawikan sa dagat.
Gidili sa balaod ang pagkuha sa maong matang sa mananap sa dagat tungod kay nahurot-hurot na ang mga pawikan karon sa kalibotan tungod sa walay puas nga pagkuha kanila alang sa ilang karne, bayanan ug itlog. – /EIM) (BANAT NEWS)
- Latest
