Gisud og sako gipatay

CEBU, Philippines – Nadugta na dihang nakit-an ang lawas sa usa ka 22- anyos nga lalaki nga gisulod sa sako nga gituohang gi-salvage diha sa Sitio Mahayahay, Barangay Toyom Dakbayan sa Carcar, pasado alas-6 kagahapon sa buntag.

Ang biktima giila nga si Jemuel Mangyao Racho, taga Sitio Upper Tawog, Barangay Valladolid, Carcar nga gituohang upat ka adlaw na nga patay una pa kini nakit-an matud pa ni Police Officer 1 Francisco Saberon, assistant investigator sa Carcar Police nga nahinabi sa Banat News.

Pasado alas 6 gahapon sa buntag nadiskubrehan ang sako nga grabeng kabaho ang sud niini hinungdan nga nitawag ang mga opisyales sa barangay sa kapolisan aron pagsusi sa sud        niini.

Matud pa ni Saberon nga duha ka sako ang giputos sa lawas sa biktima ug ang baba niini gitaptapan og masking tape samtang ang iyang duha ka kamot gibinaklid sa paggapos. Ang baba sa sako gihiktan usab og tie wire.

Ang inahan sa biktima mao ang miila sa patay nga lawas pinaagi sa tattoo sa biktima sa iyang likod ug ang kolor sa sinina nga iyang gisuot.

Sumala pa ni Saberon nga katapusang nakita nga buhi ang biktima niadtong sayo sa Sabado sa gabii nga nagpalit og beer. Pagkaalas- 12 sa gabii sa susamang adlaw, ang mga residente sa Sitio Mahayahay ang nakamatikod og usa ka kolor itom nga van nga mihunong sa crime scene ug pagkataod-taod mibiya ra usab sa lugar. Gituohang mao kini ang milabay sa lawas sa biktima ug walay nakakita sa plate number niini tungod sa kangitngit sa dapit.

Sa pagkutlo sa balita dili pa matumbok sa kapulisan kung unsa ang gikamatyan sa biktima apan ilang girekomendar ang pagpa- autopsy niini.

Pipila ka adlaw na ang nakalabay mibisita usab sa buhatan sa Carcar Police ang inahan sa biktima kay kini namasin kung nadakpan ba sa mga polis ang iyang anak kay dugay na nga wala nakauli.

Ang kapulisan aduna nay gisundan nga posibleng suspek sa krimen human nga ang inahan sa biktima nga si Fe mihatag og impormasyon sa mga polis kun kinsa ang katapusang gikauban sa iyang anak sa wala pa kini na-missing. Si Saberon usab midugang nga sa iyang nasayran niadtong bulan  sa Septiyembre niresponde ang kapolisan sa lugar diin magpuyo ang biktima kay nanghasi kini.

Nasayran usab nga nag-atubang kaniadto og kasong frustrated homicide si Racho apan na-settle ra ang kaso human gikatahong gibayran ni Racho ang biktima.

Sumala pa sa kapulisan mibutyag usab ang inahan ni Racho nga tiggamitan og drugas ang iyang anak apan wala nagbaligya niini.

Apan si Saberon mipasabot nga kung tan-awon ang klase sa pagpatay sa biktima kini klaro kaayo nga duna’y grabeng kalagot ang mihimo sa krimen.

“Murag di na siguro masulod sa gantangan ang kasuko sa mihimo ani sir kay brutal man kaayo ang krimen, Christmas pa man unta , at least karon naa na ta’y matawag nga person of interest,” sigun pa ni Saberon. – /EIM) (BANAT NEWS)