Last minute shopping giandaman
CEBU, Philippines – Nipahimangno ang City of Talisay-Traffic Operation Division Authority (CT-TODA) sa katawhan nga mosayo sa pagpalit sa mga butang nga ila’ng andamon sa adlaw sa Pasko.
Si Konsehal Valeriano Ylanan, chairman sa CT-TODA, nagkanayon nga iya na’ng gitigum ang iya’ng mga sakop aron tagaan og igo’ng pagtagad ang nahabiling duha ka adlaw sa dili pa ang Pasko.
Sama sa mga niagi’ng daku nga kalihukan, gilauman nga ang katapusang mga oras ang gipaabot nga daghang tawo nga manggawas sa ila’ng panimaye aron sa pagpalit og unsa nga butang o pagkaon nga ila’ng saw-an para sa noche buena.
Siya nagkanayon nga naa sa 100 ka sakop sa CT-TODA ang iya’ng ipakatap sa kadalanan aron mohatag og kahapsay ug mopahiluna sa mga sakyanan nga magdagan.
Iya’ng gitagaan og gibug-aton ang traffic unya sa Barangay Tabunok diin mag-agian ang halos tanang sakyanan paingon ug gikan sa habagatan.
“Ang Tabunok gyud ang amo’ng tagaan og pagtagad kay diha gyung dapita ang maghuot ang mga sakyanan,” matud ni Ylanan.
Hinungdan nga siya nanawagan sa katawhan nga kun mahimo maglikay na sila sa last minute shopping kay gawas pa nga matanggong sa traffic matanggong sab sila sa taas nga linya sa pagpalit og mga pagkaon ug butang sa bisan asa’ng tindahan.
“Ako nihangyo sa katawhan nga aron sila dili mahasol panahon sa Pasko, paliton na unta nila daan ang ila’ng kinahanglanon,” dugang ni Ylanan. Iya sad giklaro nga ang mga drayber nga badlungon nga makadugang sa grabe unya nga traffic ang ila gyud dakpon. – /GMR) (BANAT NEWS)
- Latest
