P40M proyekto ipatuman sa kalungsuran

CEBU, Philippines – Ang hunta probinsiyal miaproba og 15 ka resolusyon alang sa implementasyon sa  P40 milyones nga mga proyekto nga sagad pagpanindot sa mga karsada.

Ang pundo sa mga proyekto adto kuhaon sa local development fund nga katumbas og 20 porsiyento sa Annual Budget 2015 sa probinsiya.

Ang presidente sa Liga ng mga Barangay nga si Bokal Celestino Martinez, III, usa sa mipalabang og resolusyon nga naglatid sa mga gastohanan.

Kini naglakip sa P23 milyones nga road construction, repair ug rehabilitation sa barangay roads sa mga lungsod sa Barili (P4 milyones); Sogod (P2 milyones); Consolacion (P15 milyones) ug Poro, Camotes (P2 milyones).

Ang dakbayan sa Naga ug Barangay Gilutungan, lungsod sa Cordova makabaton unya og bag-ong generator nga nagkantidad matag usa og P1.350 milyones.

Ang Barangay Tubod sa Barili gigahinan usab og P100 mil alang sa renovation sa ilang evacuation center.

Ang Cebu Technological University (CTU) sa Tabogon makadawat usab unya kini og P2.5 milyones alang sa pagtukod sa bag-ong school building samtang ang Barangay Lamac, Consolacion hatagan og P250 mil alang sa construction sa ilang sports complex.

Ang Barangay Gawi sa Oslob makadawat usab og P30 mil nga gahin alang sa construction sa Malabago water reservoir.

Subay niini, si Bokal Peter John Calderon miduso og tulo ka resolusyon alang sa mga proyekto nga ipatuman sa Argao, Sibonga ug Moalboal. Ang lungsod sa Sibonga makadawat og P3 milyones alang sa pagsemento sa ilang sports complex samtang P1 milyon sa Moalboal aron ipalit og water tank ingon man construction ug rehabilitation sa nagkalain-lain nilang proyekto.

Lakip sa giduso nga resolusyon mao ang paghatag og mini-ambulance ngadto sa Barangay Bulasa, Argao nga mikantidad og P205 mil.

Si Bokal Christopher Baricuatro ug Thadeo Ouano miduso usab og resolusyon alang sa P70 mil nga ipamalit og handheld radios sa Barangay Calangcalang, Badian ug Poblacion Oriental, Consolacion.

Ang hunta probinsiyal miaprobar usab sa resolusyon ni Bokal Alex Binghay sa paghatag og P4.9 milyones nga budget alang sa mga proyekto ngadto sa nagkalain-laing LGU.

Samtang si Bokal Sun Shimura miduso usab kini og resolusyon sa paghatag og P2.5 milyones nga budget ngadto sa CTU Tabogon Campus alang sa construction sa bag-ong building, maintenance sa street ligting nga P30 mil sa Barangay Poblacion, San Remigio ug P50 mil alang sa Barangay Sambag, Tabogon.

Giaprobahan usab sa hunta probinsiyal ang P50 nga realignment alang sa pinansiyal nga hinabang nga gamiton sa rehabilitation sa health center alang sa extension sa waiting area sa barangay health center sa Sulangan, Bantayan Island. Si Bokal Grecilda Sanchez mipalabang usab og resolusyon alang sa P150 mil nga cash assistance nga gamiton sa road rehabilitation gikan sa Sitio Bugasok ngadto sa Sitio Curos-curos Transcentral Highway sa Barangay Duangan, lungsod sa Balamban.

Si Bise Gobernador Agnes Magpale mipagahin usab og pundo nga P349 mil ngadto sa nagkalain-laing LGU sa probinsiya aron dunay magamit nga budget sa nagkalain-laing proyekto. – /RUB) (BANAT NEWS)