LTO wala pa makabalhin
CEBU, Philippines – Ang mga opisyal ug kawani sa Land Transportation Office (LTO)-7 wala pa gayud makabalhin sa bag-o nila nga opisina nga ilang balhinan.
Kini tungod kay hangtud karon padayon pa ang kadagkoan sa LTO nga nangita og dapit nga adto sila mag-opisina kay gipapahawa na sila ni Mayor Michael Rama gikan sa dapit nga ilang nahimutangan diha sa Natalio Bacalso Avenue.
Ang yuta nga giukopahan sa building sa LTO-7 regional office gipanag-iya sa kagamhanan sa dakbayan ug gusto na ni Mayor Rama nga kini gamiton alang sa expanded wards sa temporaryo nga Cebu City Medical Center.
Si Arnel Tancinco, acting regional director sa LTO-7, miingon nga ang post office building kilid sa Fort San Pedro maoy ilang gitan-aw nga abangan aron anha sila mag-opisina apan wala pa makompleto ang kasabotan.
Tinguha unta sa LTO nga makabalhin na sila kaniadto pang Nobiyembre 1, apan wala gyud kini matuman.
Ang kasabotan nagkinahanglan nga aprobahan pa sa kadagkoan sa Department of Transportation and Communications (DOTC). Gitan-aw nga ang maong building haum kaayo nga gamiton nga opisina sa LTO kay ang atubangan kaparkingan og mga sakyanan.
Mga motorista nagreklamo kay ang LTO-7 regional office sa Natalio Bacalso Avenue dili na gani pasudlan bisan motorsiklo kay wala silay lugar nga kaparkingan. (BANAT NEWS)
- Latest
