Mga drayber og tricycle sa Mandaue nabalaka

CEBU, Philippines – Mga drayber og traysikol sa Mandaue City gibati og kabalaka nga mawad-an sila og panginabuhian kun wad-on na ang mga traysikol nga mobiyahe sa kadalanan isip paagi pagsulbad sa problema sa trapiko.

Si Elmer Bacus, 41-anyos, taga Ibabao-Estancia, Mandaue miingon nga nakadungog sila og mga huhungihong nga adunay plano nga ang mga traysikol ilisan na og multicab aron  malikayan ang kahuot sa kadalanan.

Ang mga kauban ni Bacus miangkon nga nakadungog sila sa tabi-tabi nga usa ka politiko nagplano sa paghulip og multicab sa mga traysikol tungod kay kining maong mga sakyanan maoy naghatag og kahuot sa kadalanan.

Bisan sa lungsod sa Consolacion sa amihanan ug sa Minglanilla ug Naga sa habagatang Sugbo, ang mga traysikol nakatampo sa problema sa trapiko tungod kay mosulod man sila sa national highway nga makababag sa pag-agi sa ubang mga sakyanan.

Sa dakbayan sa Mandaue lang, adunay gibana-bana nga 3,000 ka traysikol nga nagbiyahean sa lainlaing barangay apan sila mosulod sa kinapusorang bahin sa dakbayan.

Ang lagda mao nga ang mga traysikol gidid-an unta sa pagsubay sa national highway apan ang balaod wala hingpit nga gipatuman. (BANAT NEWS)