Pari nanuok og sakristan

CEBU, Philippines – Usa ka concerned citizen ang mireklamo ngadto sa Cebu Archdiocese kagahapon sa buntag batok sa usa ka pari sa Isla sa Olango nga gipasanginlang nimaltrato sa usa ka bata ug sa mga residente niini.

Si "Lea" di tinuod pangalan ang mipadala og suwat ni Archbishop Jose Palma sa miaging Disyembre 14, nangayo og tabang.

Sa miaging semana, ang 16-anyos nga sakristan gikatahong gituok, gihanaan og sumbag ug gibalikas  sa maong pari.

Misaysay ang menor de edad sa Banat News nga nahitabo ang pagpangabuso hapon sa Disyembre 13 sa dihang miadto siya sa opisina  maong pari aron  hangyuon nga dili ihinayon ang ilang Christmas party.

Kay gusto nila nga ang budget sa ilang party ilaha na lang gamiton alang sa ilang pamelete ug gastos sa ilaha unyang pag-serbisyo sa usa ka Santos nga Misa sa Basilica del Sto. Niño sa umaabot nga Pasko.

Apan gikatahong wala mosugot ang pari ug nasuko kini kay gusto niya nga madayon ang Christmas party.

"Gibusdakan ko sa iyahang kamot (sa lamesa), gituok ug gihanaan ko sa iyahang kumo," matud sa menor kinsa midugang nga gibalikas siya niini dihang misuway siya og pagpasabot sa iyang rason.

"Iyaha ko giingnan og 'pisti ka, yawa ka, buang ka, mga mini mo, ayaw na pagsakristan, ayaw na pakita nako!," dugang niini.

Sa miaging Sabado, usa ka miyembro sa iladong pamilya sa isla ang mireklamo usab sa lihok sa pari human nakit-an nga aduna siya'y gikasab-an nga sakristan samtang adunay gipahigayong misa sa patay.

Si "Cynthia", dili tinuod niyang pangalan ang mipaambit sa Banat News nga dili mao ang gibuhat sa pari.

"He was scolding them during the mass. I don't know maybe he is frustrated about their service or that the sacristans cannot cope up with him. It was not in the right place to display emotions, " matud ni Cynthia.

Matud niini, dili lang siya ang nakabantay sa bati nga batasan sa pari kundi hasta ang mga residente sa isla nakamatikod usab.

" I heard three, five, more than of it (complaints). During the mass of my mother, I feel his unholiness. I was very disappointed. Frustrated, honestly. I gave him considerations two months ago but it became habitual," dugang niini.

Sa pagkakaron, giabisuhan si Lea ngadto sa arsobispo nga mohimo sila og ilahang pakisusi human sa International Eucharistic Congress sunod tuig.  – /EIM) (BANAT NEWS)