Suspension order ni Soc wa pa nadawat

CEBU, Philippines – Bisan sa pagsuspenso kang Konsehal Socrates Fernandez, nitambong gihapon kini sa sesyon sa konsehal sa Dakbayan sa Talisay niadto’ng Martes.

Si Bise Mayor Romeo Villarante nipadayag nga si Fernandez nitambong sa rason nga wala pa nadawat sa konsehal ang kopya sa suspension order. Gani siya nagkanayon nga ang iya’ng buhatan pakyas pa usab sa pagdawat sa mao’ng kamanduan.

Sa nasayran nipagawas og kamanduan ang Visayas-Ombudsman sa pagsuspenso kang Fernandez sulod sa 90 ka adlaw. Kini may kalambigitan sa kaso sa pagkuha ni Fernandez sa usa ka bag nga sulod sa iya’ng sakyanan nga ubos na sa kustodiya sa kapolisan samtang siya pa ang mayor sa Talisay.

Ang sakyanan ni Fernandez ang nalakip sa pagkasakmit tungod kay gigamit kini sa iya’ng anak nga si Joavan Fernandez diha’ng kini gidakop human nakahimo og salaud.

Matud ni Villarante nga magdepende na lang sa Department of Interior and Local Government kun kanus-a nila i-implementar ang suspension order.

Asoy pa niya nga kun malangan man gani ang pagpatuman hayan posible’ng maabtan kini sa election ban.

Gani kun mapatuman kini sa sayo’ng bahin sunod tuig posible’ng dili na makabalik si Fernandez sa dili pa ang eleksiyon.

Ikaduha na ni Fernandez nga nalutsan og suspension order gumikan sa binuhatan sa iya’ng anak.

Gipasabot ni Villarante nga dili makaapekto sa konseho ang pagkasuspenso ni Fernandez apan maibanan lang ang gidaghanon sa mayoriya nga sakop sa Alayon Party.  (Gabriel C. Bonjoc/GMR)(BANAT NEWS)