CEBU, Philippines – Karon pa lang nipahibawo na ang Sinulog Foundation Inc. nga did-an ang mga street party ug paghubog-hubog atol sa Sinulog Festival karong Enero.
Gipanghimug-atan sa SFI nga kinahanglang ipatigbabaw ang relihiyoso’ng aspeto sa kalihukan.
Matud ni Ricky Ballesteros, executive director sa SFI, nga salikwaot kaayo’ng huna-hunaon nga human sa relihiyoso’ng kalihukan, daghan kaayo’ng mogawas sa social media nga nangligdas nga babaye ug lalaki gumikan sa kahubog. Gibutyag ni Ballesteros nga nahan-ay na ang tanan ug iplastada na lang nila ang detalye sa Sinulog 2016 diin lakip sa ila’ng gihan-ay ang budget nga mokabat sa P47 milyones diin P30 milyones niini gikan sa kagamhanan sa Dakbayan sa Sugbo ug ang uban gikan sa mga sponsors. Nanghinaut si Ballesteros nga mahatagan sila og P3 milyones nga ayuda gikan sa Kapitolyo diin P1.5 milyones ang wala pa nahatag niadto’ng 2013, 2014 ug ang laing P1.5 milyon ang alang karong tuiga.
Si Gobernador Hilario Davide III sa iya’ng bahin nibutyag nga iya pa’ng susihon ang gipangayo sa SFI ug dili pa siya makahatag og tukma nga kantidad sa ayuda nga ila’ng ihatag. (Rowena D. Capistrano/GMR)(BANAT NEWS)