Daan nga kwarta pailisan na

CEBU, Philippines – Gipahibawo sa Bangko Sentral ng Pilipinas nga aduna pa'y nahabiling 432 milyones nga new design series kon kadto’ng karaan nga kwarta nga mawagtangan na unya og bili sugod Enero 2016.

Ang NDS mao kadto’ng i-demonitize na apan mahimo pa’ng pailisan sa new generation currency kun ang bag-o nga kwarta.

Giklaro hinuon ni Atty. Leonides Sumbi, acting director sa BSP-Visayas, nga dili sila makasulti sa kantidad sa mao’ng kwarta tungod kay aduna'y uban niini nga gipailisan na og bag-o.

Matud ni Sumbi nga ang labi’ng uwahi nila nga monitoring niadto pa’ng Septiyembre 30.

Gumikan kay 12 na lang ka adlaw sa dili pa matapos ni’ng tuiga, niawhag si Sumbi sa publiko ilabi na kadto’ng may gitaguan nga karaang kwarta nga magsugod na sa pag-ilis sa bisan unsa nga bangko ug mahimo usab sa ila’ng buhatan sa BSP.

Lakip sa angayan mahibaw-an sa publiko nga ang bag-o nga kwarta nagkadaku ang pagkasuwat sa serial number itandi sa daan nga pareho lang kini og gidak-on.

Itandi usab sa daan, mas batan-on ang nakapilit nga nawong sa kwarta diin mga edaran ang anaa sa karaan nga kwarta.

Bag-o usab nga logo sa BSP ang gibutang sa bag-ong kwarta diin ang logo kini nga aduna'y agila.

Giklaro usab nga sa tibuok tuig 2016, bisan pa man nga wala na'y bili ang karaan nga kwarta apan mamahimo pa gihapon kini nga pa-ilisan sa mga bangko ug sa BSP.

Apan sa tuig 2017, hingpit nga wala na kini'y bili ingon man dili na usab mahimo’ng pailisan. (Decemay P. Padilla/GMR)(BANAT NEWS)