P6.4B budget sa siyudad sa 2016

CEBU, Philippines – Giaprobahan na sa konseho sa Dakbayan sa Sugbo ang P6.4 bilyones nga annual budget sunod tuig nga mas ubos sa P13.4 bilyones karong tuiga.

Wala gilakip isip tinubdan sa pundo ang P2.7 bilyones nga halin sa luna sa South Road    Properties.

Matud ni Konsehal Margarita Osmeña, chairman sa committee on budget and finance sa konseho, niingon nga may kaso pa nga gipasaka ni Romulo Torres  labot sa halin sa SRP.

Ang konseho nidugang sa pundo sa pipila ka items sama sa P250,000 ngadto sa P4.2 milyones nga incentives alang sa mogradwar sa elementarya ug sekondarya sunod tuig ug P770 milyones ngadto sa P807 milyones nga financial assistance sa mga senior citizens.

Lakip sa gipadak-an ang burial assistance gikan sa P35 milyones ngadto sa P50 milyones ug ang P1.3 million gihimo’ng P2 milyones alang sa anti-discrimination item.

Ang nipabor sa pagpasar sa budget mao sila si Konsehal Osmeña, Alvin Dizon, Alvin Arcilla, Eugenio Gabuya, Ma. Nida Cabrera, Sisinio Andales, Mary Ann delos Santos, Roberto Cabarrubias ug Lea Japson.

Samtang ang nisupak mao sila si Konsehal Gerardo Carillo, Noel Eleuterio Wenceslao ug Phillip Zafra.

Nigawas si Konsehal David Tumulak atol sa deliberation samtang sila si Konsehal James Anthony Cuenco, Richard Osmeña ug Hanz Abella ang nipalta sa sesyon.

Si Carillo nipahimangno sa iya’ng kaubanan nga ang gipasar nga budget hayan adunay legal questions.

Si acting Mayor Edgardo Labella niingon nga iya’ng huwaton ang napasar nga appropriation ordinance nga maabot sa iya’ng lamesa una pa siya mohimo og aksiyon. (Gikan sa The Freeman/GMR)(BANAT NEWS)